奧運感想一二三
Published by B.Lex August 17th, 2008 in "writer - B. Lex", blogging.看了一半的奧運會, 往年可能時間問題, 看得比較少。今年始終係中國舉辦, 倒是有更多關注。
印象最深刻一定係男子一百米飛人保特, 你邊有睇過有人最後衝線係攤開雙手兩頭望? 最恐怖係咁都可以破世人最關注o既一百米紀錄, 相信佢平日練習都知自己可以帶出幾多, 真係好想睇佢認認真真咁跑一次, 好想真正咁感受下佢最強o既衝刺力。
[真係成條街…]
菲比斯八金傳奇固然好看, 但係作為今屆奧運會o既一個傳奇, 其實會唔會得到一o的無型o既優勢呢? 主辦單位、奧委會、泳壇、傳媒等等, 未必一定都想佢破紀錄, 但最起碼唔想佢響頭幾關就下馬嘛? 不過點都好啦, 佢其實真係超o左班了…
睇中國男子羽毛球手林丹比賽的確好看, 好看在那一種霸氣, 無論速度, 技術都是超班, 再加上甚少煩錯加上那份霸氣, 好想睇下有咩人可以俾到壓力佢, 可惜今屆佢實在贏得太輕鬆了。
[真係攻守都太強了, 唔怪得叫超級丹啦]
中國女排下下領先兩局都最後反輸2:3, 人人都話佢地心理質素奇差, 真係咩? 我就話戰術奇差先o岩, 十球有七球進攻係靠重炮手王一梅, 當佢好氣好力頭兩局咪順風順水囉, 用得太盡, 後尾佢有無氣, 加上太過單調結果兵敗如山倒, 教練難辭其疚。
[以王一梅o既身形, 其實佢都算係好好活力了]
真正心理質素差應該係香港男女乒乓隊, 得罪o的講, 佢o地始終唔係國內o既一線球員, 或者技術上相差不遠, 不過心理質素同穩定性同國內主力的確相距甚遠, 或者, 呢個就係球星同球員o既分別吧。
睇o左唔少賽事, 發覺俄羅斯女子的確係超班, 無論係身材定樣貌, 好少失準。
[雖然代表美國, 但係柳金都係俄羅斯美女o黎]
好多人都話二奶台今年做得好過大婆台好多, 因為大婆台用一班無樣貌無口材無知識o既主持人不停廢up, 而二奶台就有一個全能徐嘉諾。
個人覺得呢個都唔係一個重點, 二奶台今屆的確係比大婆台出色, 最主要係大婆台實在太無誠意, 三分鐘賽事, 十分鐘廣告, 一早講明會重點播黃金寶賽事, 點知播得果幾分鐘就去新聞, 今日全日宣傳以8:48 男單羽毛球決賽為重點賽事, 點知去到九點半賽事就完結先求其播幾球, 我覺得完全被騙…
當大婆恃住自己係正室, 當你係白痴兼好食懶非, 完全唔理你感受時, 真係好希望呢個二奶可以爭氣返少少。
最後想講無論點都好, 今屆北京奧運一定係非常成功, 因為禮儀小姐們實在是太棒了!!!
<<B.Lex>>
禮儀小姐, 睇練習/綵排時靚好多, 點解呢 ?
林丹, 我又唔多鐘意, 太囂了
跑100米, 竟然過左60m可以放軟手腳, 其實好反高潮
反而pfelps在第7金, 憑壓池既技術險勝0.01 秒, 真係扣人心弦, 從未試過有o甘長既0.01 秒
禮儀小姐, 睇練習/綵排時靚好多, 點解呢 ?
^== 因為我揀過黎….
林丹, 我又唔多鐘意, 太囂了
^== 我都唔鐘意佢囂… 不過睇完真係覺得佢囂得起
反而pfelps在第7金, 憑壓池既技術險勝0.01 秒, 真係扣人心弦, 從未試過有o甘長既0.01 秒
^== 肉眼睇其實好似係人地快少少….
其實明珠既nicam精彩d!
有得笑下有冇咁廢
睇完毛毛波我最深印象係李宗偉好似崔健邦!!!
柳金係幾正, 身形贏晒! 佢隊友莎恩莊遜點睇都唔順眼! 個得戚樣丫
今屆奧運又好似真係睇得最多, 好過睇膠劇多多聲
肉眼睇其實好似係人地快少少….
>>>
你冇睇atv了
王大力當時即刻解釋左:
芍手雖然掂塘sin, 但由於佢最後一個動作唔夠手位
要順住個水勢
掂池一下唔夠力
因為個感應器係要有2kg力先有反應(o甘做, 係防上水波搞壞個感應器)
phelps就係贏壓池最後果一下
Hi small Bean
李宗偉令我好失望, 全無還擊之力就打完, 根本林丹都無受過考驗, 好無癮….
佢隊友莎恩莊遜點睇都唔順眼! 個得戚樣丫
^== 佢成日輪, 但係都好得戚, 呢下先奇怪