BLOGAZINE-HK

當人人話opening只不過是一場show, 何必認真, 我呢份人特別千奇百怪, 仍然死抱奧林匹克精神去要求, 越睇越多唔順超, 認真抵死。

歌唱祖國
開場搵小女孩唱”歌唱祖國”, 認真怪: 國慶文藝晚會就話唶, 奧運開幕第一首歌竟然歌唱社會主義祖國, 怪雞之餘, 猶如果美國搞奧運唱”born in U.S.A.”。

至於咪嘴事件, 我反而有興趣知林妙可何得可能, 竟然可以令o甘多人冒天下大不諱, 死都要佢上台 ?

鄭和下西洋

呢一段, 更加係”謎中之謎”。

在中國歷史上, 鄭和下西洋係一件懸案。當時明成祖剛入燕京, 誅方孝儒十族, 遜帝下落不明, 天下未定, 成祖竟然窮天下之力, 派太監鄭和三下西洋, 但所為何事 ? 既未有開闢彊土, 更未有促進貿易, 似旅遊多過奉旨出洋。三下西洋之後, 成祖更立即下海禁。

於文明交流無功, 在中國歷史亦毫不重要, 張大導何解又大鑼大鼓? 奇怪。唯一既解釋係, 好適合場面設計。

運動員進場

運動員進場先係我心頭好, 一樣睇到滿腹疑惑。

日本隊進場, 完全影唔到福原愛個樣, 電視台導演, 算失職了。

南韓進場無人理, 北朝鮮卻掌聲雷動 , 叫世人如何理解中國人?

中國隊最尾入場, 竟然cut走澳洲隊, 只影住中國隊等進場, 仲要影足幾十秒, 是否有點唔尊重呢 ?

中國隊既制服雖然被譏為”番茄炒蛋”, 但仍然比想像中好, 至少冇打tie, (家人笑稱打tie look 既中國隊似福祿壽)。當然, 如果男士們唔反大關刀既恤衫領出黎, 可能仲會加分。

點火

李寧點火, 睇既時候哇哇聲。之後越諗越怪, 又係另一懸案。

“夸父追日”, 係中國神話, 講夸父發神經要捉個太陽, 結果壯志未酬, 筋疲力盡而死。如此傳說, 用來象徵今次奧運, 語帶不祥。究竟幕反人是一時興起, 還是冇讀過書 ?

傳統上開幕禮點聖火, 係象徵奧林匹克精神。想一下巴塞隆拿那次, 用射箭帶出聖火, 又想想阿特蘭大那一次, 柏金遜的前度拳王顫抖中點起聖火, 那是何等壯嚴 ? 但李寧化身特技人, 究竟乜事 ?為左大show犧牲運動員精神, o甘奧運會仲有乜意義?

我記得幾年前奧運完畢之後, 偉大祖國派得獎運動員來港接受市民祝賀, 結果變成劉璇要再大球場唱歌娛賓。

回想起來, 直播時, 我竟然有少少睇緊tvb台慶既感覺, 只不過今次不是楊盼盼。

ADIDAS的幾千萬贊助費, 落左鹹水海了。

明明俾左錢做獨家廣告, 但最注目果一個環節, 就然俾另一間運動用品公司既主席玩曬

李寧, 一定要買AR~~~講既係股票編號 #2331 既李寧 !!

即係如果話有o甘多問題既制作, 不應深究, 一場show而已。O甘, 唔該用同一標準睇mummy 3、”黃金甲”、”無極:……

 <<doo doo chang>>

———————————————————————————————-