教你扮網上股神

Published by doo doo chang August 7th, 2008 in finance, "writer - doo doo chang", hong kong.

去年股市旺盛, 上討論區打個轉, 會見到大量股神指點迷津, 難得真係有唔少股民問number。

時移世易, 大市逆轉, 各位股俠集體失蹤, 不足為奇; 奇就奇在竟然還有大量股神繼續教化社會大眾。好奇心下, 翻睇各位網上股神言行, 發現只要跟足下面幾條規則, 原來人人可以做股神 —- 只限網上。

規則一: 扮價值投資

開口埋口長期持有buy and hold，　講多兩講就話畢菲特都係同門師兄弟, 當然, 如果識得背幾本書名, 就更加有說服力。

如果仲有人問多幾句, 就講埋peter Lynch、東尼….。至於是否真係睇過, 係冇人問的。

互聯網之後, 佢多左好多師兄弟

規則二: 玩謝財經演員

市場需要, 電視日日有大量講股市升跌既分析人士, 這些要拋得露面的仁兄仁者, 一般被謔稱為財經演員。作為價值投資者, 當然要不屑於與財經演員為伍, 但千萬不要實牙實齒批評, 因為陸叔/黃師父隨時有大量fans 同你全時間開拖, 講多幾講, 好易露底。

遇上埋身問題, 最好扮大方: 哦, 陸叔有時都幾準架 !

好似佢o甘既財經演員, 我都想做

規則三. 扮無知

網上小股民, 一定會問你點睇個市, 最穩陣既方法係扮唔識 : 我地呢d投資者唔識投機, 唔識短期走勢。

如果有人問number問行業, 最緊要講宏觀分析, 再講少少數字。例如: #44 係國泰屬下, 獨市生意, 而且派息唔錯, 如果xxx情況下值得持有, 不過遇上yyy就會zzzz。(x, y, z 由你自己填寫)

記住唔好引經論據, 因為好易比人發現你係copycat。

規則四: 扮唔識

一般市民當然會直接問number, 由於各種number都有, 你唔可能通天曉, 何況批命批中就冇所謂, 萬一有三長兩短就壞左招牌。應付方法同上。

規則五: 龍頭股

總有無知市民會叫你俾number, 完全唔俾又會俾人笑, 標準答案係 #005、#945、#941, 總之就抄東尼、林森池、quamnet。

如果有人話鬼唔知阿媽係女人, 應付方法見規則一。

從來冇人敢叫人唔好買5 號仔

規則六: 泰山崩於前

大市由32000跌至現在的22000, 總有人不懷好意問你蝕幾多。應付方法不出”長期持有”、”趁低吸納”、” 有升就有跌”、”平常心”….各項答案任擇其一(選兩三項都得) 。如果有人問你應該入市未, 標準答案係將現有水平減2000點。如果對方仲質疑, 你就答佢: 現時未夠低, 風險太大了…….

如果有人講得中股市既高高低低, 佢應該有錢過李嘉誠, 仲會同你係網上chat ?

只要你重重覆覆運用上面六條戒律, 一定有大把人叫你股神(現實的你是否如此, 係冇人理你的)

<<doo doo chang>>

—————————————————————————————–

BLOGAZINE-HK